澎湖諺語

資料出處「澎湖諺語」、高芷琳著

錄音者：高芷琳

壹、自然氣候(1)貳、産業活動(2)參、生活狀態(3)肆、婦女生活(4)伍、民間習俗(5)陸、傳說典故(6)柒、處事箴言(7)捌、笑言謔語(8)玖、歇後語(9)

肆、婦女生活

一、婦德(7)
1
澎湖查某，臺灣牛。
2
做媽磨甲叫毋敢。
3
雙手抱雙孫，無手通穿裙。
4
查某人，兩條管，想來想去想倒轉。
5
雞母袂使拜天公。雞母袂使孝天公。
6
目屎流埔。
7
菜頭挽起空原在。
二、婦容(8)
1
穿tiau3-tah4，毋通落破。
2
一白蔭九烏。
3
一白贏三媠，烏肉就毋成鬼。
4
尖跤幼手。
5
媠跤蔭面，媠頭蔭身。
6
查某人較金口。
7
第三查某囝食命。
8
大跤會拍死翁。
9
欲嫁才欲縛跤。
三、婚姻(9)
1
好田宅，不如好兄弟。
2
種田看田底，娶某看娘嬭。
3
嫁人擔蔥賣菜，毋嫁人半爿翁婿。
4
緊紡無好紗，緊嫁無好大家。
5
一錢丶二緣、三媠、四少年、五敢丶六好膽、七皮、八綿、九跪丶十拜，好翁婿。
6
三代人無翁，毋通嫁頂湖人。
7
三丶四代無翁，毋通嫁水垵人。
8
頂湖翁毋嫁，頂湖草欲割。
9
欲娶刺的，毋通娶挐的。
10
敢掠人的豬，煞毋敢鑽人的豬牢。
11
過船渡槳。
12
聘金提倒來，添丁佮進財。
13
清水清kiang3-kiang3，入門得人疼。
14
戶橂跨予過，通家食百二歲。
15
新娘大步行，入門蔭翁，蔭子，做大官，著頭名。
16
鉛粉suh4-suh4飛，入門會蔭家。鉛粉suh4-suh4飛，新娘入門，緣份生迵家。
17
新娘媠媠，囝婿枵鬼，媒人婆仔不死鬼。
18
我鞋疊你鞋，我若大聲叫，你就細聲喂(ue1)。
19
兩枝甘蔗倚門後，公婆食甲老老老。
20
大粒干樂細條索，矮細之娘配懸哥，干樂拍出田索無。
四、生育(10)
1
無囝命，袂堪e1得。
2
食了粿，生查埔；食了甜，生後生。
3
食甜甜，生後生。
4
娶這新婦曷袂生，煞是媒人歹收si5。
5
媒人喙，糊瘰瘰。
6
恁厝無雞翁，恁囝無頭hang1。
7
天公毋落雨，犁頭無落三寸塗，按呢五穀哪會種落塗。
8
生一个囝，落九枝花。
9
補胎較好做月內。
五、婆媳(11)
1
三个新婦較gau5，嘛毋值得一粒蔥頭。
2
房若較懸廳，新婦就較懸大家。
3
大家有話，新婦無話。
4
大家有話，新婦無喙。
5
甘願佇庄跤做大家，毋願佇都市做新婦。
6
翁親丶某親，老婆仔紡捙輪。翁親丶某親，老婆仔peh4捙輪。翁親丶某親，老婆仔紡sua輪。
7
新婦哭禮數，查某囝哭腸肚。
8
濟牛踏無屎，濟查某相伴睏。
9
濟囝餓死爸，濟新婦餓死大家。
10
夾別人的肉咧飼大家。
11
翁死閣予逐家講笑。
六、夫妻(12)
1
枕頭神，上靈聖。
2
愛某媠，替某擔水。
3
後頭厝，倚袂富。
4
二更更、三夜夜，四三丶五七丶六做牙，七挲丶八想丶九搖頭。
5
睏破三領蓆，掠君的心袂著。
6
北風li7-li7，南風li3-si3；袂佮君相見，閣等待四月南風天。
7
查埔喙大食四方，查某喙大食嫁粧。
8
斷掌查埔做相公，斷掌查某守空房。
9
查埔大甲二五，查某大甲大肚。
10
死某若割韭菜。
11
招翁娶某走。
12
家欲齊置兩犁，家欲破置兩妻。
13
種著䆀田向後冬，娶著䆀某一世人。
14
借錢娶某，生囝無夠通予人估。
15
有才調娶某毋是師傅，有才調飼某才是師傅。
七、童養媳(13)
1
姑換嫂，一面倒，一面好。
2
碗箸食久是親。
八、其他(14)
1
娘緊做，kan2歹學。
2
漚脯漚人食。
3
花am1閃爍。
4
烏龜、烏龜，燒酒三頓仔挲。
5
食人的墘底糜。